សហមេធាវីរបស់លោក កឹម សុខា គឺលោក ផែង ហេង បានប្រាប់វិទ្យុអាស៊ីសេរីនៅថ្ងៃទី៣១ ខែកក្កដាថា លោក កឹម សុខា មិនទាន់មានសិទ្ធិដើរហើរឡើយ ពីព្រោះតុលាការបានអនុញ្ញាតឱ្យលោក ចេញទៅគោរពវិញ្ញាណក្ខន្ធកងទ័ពដែលបានស្លាប់ដោយសារការពារទឹកដីប៉ុណ្ណោះ ហើយក៏ត្រូវមានព្រះរាជអាជ្ញានិងមន្ត្រីនគរបាលទៅជាមួយដែរ។
លោក ផែង ហេង ដែលបានធ្វើដំណើរទៅគោរពវិញ្ញាណក្ខន្ធកងទ័ពពលីជាមួយលោក កឹម សុខា បានបន្តទៀតថា លោក កឹម សុខា បានស្នើសុំតុលាការទៅគោរពវិញ្ញាណក្ខន្ធកងទ័ពនៅខេត្តត្បូងឃ្មុំ និងខេត្តកំពង់ចាមនៅថ្ងៃទី៣១ ខែកក្កដា និងបានបន្តស្នើសុំចេញទៅគោរពវិញ្ញាណក្ខន្ធកងទ័ពក្នុងខេត្តចំនួនពីរទៀត គឺខេត្តតាកែវ និងខេត្តកណ្ដាល នៅថ្ងៃទី០១ ខែសីហា។
ខ្ញុំគិតថា ជាសញ្ញាវិជ្ជមានមួយដែលតុលាការអនុញ្ញាតឱ្យគាត់ (លោក កឹម សុខា) ចេញទៅគោរពវិញ្ញាណក្ខន្ធវីរៈកងទ័ពយើង។ ហើយខ្ញុំគិតថា អ្នកនយោបាយក៏បានគិតដល់ចំណុចសាមគ្គីភាព និងបង្ហាញពីការរួបរួមជាតិ ឱ្យមានសំឡេងតែមួយ ក្នុងការបង្ហាញទៅភាគីបរទេស ជាពិសេសថៃថា ខ្មែរយើងចេះរួបរួមគ្នាក្នុងកាលៈទេសៈមានបរទេសឈ្លានពាន។
— លោក ផែង ហេង
លោក កឹម សុខា ត្រូវបានសាលាដំបូងរាជធានីភ្នំពេញបានផ្ដន្ទាទោសឱ្យជាប់ឃុំក្នុងផ្ទះរយៈពេល ២៧ឆ្នាំ កាលពីថ្ងៃទី៣ មីនា ឆ្នាំ២០២៣ ពីទោសក្បត់ជាតិ ប៉ុន្តែសហគមន៍ជាតិនិងអន្តរជាតិ និងអង្គការសិទ្ធិមនុស្សបានមើលឃើញថា ជារឿងនយោបាយ។
ក្រោយពីបានអុជធូបគោរពវិញ្ញាណក្ខន្ធយោធាពលី គឺលោកវរសេនីយ៍ត្រី សៀង សាត នៅខេត្តកំពង់ចាម លោក កឹម សុខា បានកោតសរសើរដល់ភាពអង់អាចក្លាហានរបស់កងទ័ពកម្ពុជា ដែលបានតស៊ូប្រយុទ្ធប្រឆាំងកងទ័ពថៃមិនឱ្យចូលឈ្លានពាន។
ខ្មែរយើងធ្លាប់ឆ្លងកាត់សង្គ្រាមឈ្លានពានច្រើនដងហើយ មិនគួរណាមកដល់ពេលហ្នឹងហើយ ថៃនៅមកឈ្លានពានយើងទៀត វាហួសហេតុ។ អ៊ីចឹងហើយ សុំអំពាវនាវឱ្យខ្មែរ ត្រូវរួមសាមគ្គីគ្នា ដើម្បីភាពរឹងមាំប្រទេសយើង ការពារទឹកដីសម្រាប់កូនចៅយើងបន្តទៀត។
— លោក កឹម សុខា
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា បានអះអាងថា កងទ័ពកម្ពុជាបានតស៊ូប្រយុទ្ធជាមួយទាហានថៃដើម្បីបន្តឈរជើងយ៉ាងរឹងមាំនៅតាមតំបន់សំខាន់ៗ រួមមានប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបីជាដើម ខណៈលោកនាយករដ្ឋមន្ត្រី ហ៊ុន ម៉ាណែត បានលើកឡើងថា រដ្ឋាភិបាលកំពុងរៀបចំគោលនយោបាយសម្រាប់គាំទ្រយោធាពិការ និងក្រុមគ្រួសារយោធាស្លាប់ឱ្យបានសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។