នៅក្នុងសន្និសីទសារព័ត៌មាន ស្តីពីលទ្ធផលនៃអត្រាពន្ធគយបដិការរវាងកម្ពុជា និងសហរដ្ឋអាមេរិកនៅថ្ងៃទី០១ ខែសីហា លោកឧបនាយករដ្ឋមន្ត្រី ស៊ុន ចាន់ថុល បានលើកឡើងថា ក្រុមការងាររបស់លោក នឹងបន្តចរចាជាមួយសហរដ្ឋអាមេរិក ដើម្បីឱ្យអត្រាពន្ធ១៩% ចុះបន្ថែមទៀត លើមុនទំនិញវិស័យកាត់ដេរ សំលៀកបំពាក់ ស្បែកជើង និងផលិតផលធ្វើដំណើរ ដែលជាវិស័យអត្ថិភាពមានកម្លាំងពលកម្មជិត១លាននាក់។
លោកបានបន្តថា ក្ដីសង្ឃឹមនៃការចរចាសុំបញ្ចុះពន្ធបន្ថែមនេះ ដោយសារទំនិញទាំងនោះ មិនមានផលិតនៅលើទឹកដីសហរដ្ឋអាមេរិក និងមិនធ្វើឱ្យប៉ះពាល់ដល់ការប្រកួតប្រជែងរបស់ក្រុមហ៊ុនអាមេរិក។
ដូច្នុះ យើងខ្ញុំនឹងខិតខំបន្តចរចា ធ្វើយ៉ាងណាឱ្យបានទាបជាង១៩% ទៅលើទំនិញមួយចំនួន ជាទំនិញអត្ថិភាពរបស់កម្ពុជាយើង ដែលបង្កើតមានការងារជិត ១លាននាក់ ជូនបងប្អូនយើងធ្វើ ជាពិសេសគឺស្ដ្រី ហើយម្នាក់ៗ គាត់ជួយទៅគ្រួសារគាត់ ៤ ទៅ៥នាក់ ជាវិស័យដ៏សំខាន់របស់កម្ពុជាយើង។
— លោក ស៊ុន ចាន់ថុល
លោក ស៊ុន ចាន់ថុល បានបន្ថែមថា នៅក្នុងកិច្ចព្រមព្រៀងពាណិជ្ជកម្មចុងក្រោយនេះ កម្ពុជាបានសម្រេចគិតអត្រាពន្ធ០% លើទំនិញនាំចូលពីសហរដ្ឋអាមេរិក រួមទាំងការសន្យាទិញយន្តហោះដឹកអ្នកដំណើរ ប្រភេទ ប៊ូអ៊ីង ៧៣៧ ( Boeing 737MAX 8) ចំនួន២០គ្រឿង។
កម្ពុជាមានរោងចក្រកាត់ដេរជាង១៦០០កន្លែង និងមានកម្មករ ប្រមាណ៩៧ម៉ឺននាក់ ដែលទទួលបានប្រាក់ឈ្នួលប្រចាំឆ្នាំប្រមាណ ៣១០០លានដុល្លារ។ នេះបើតាមតួលេខពីក្រសួងការងារ និងបណ្ដុះបណ្ដាលវិជ្ជាជីវៈ។ កាលពីឆ្នាំ២០២៤ ការនាំចេញពីវិស័យកាត់ដេរសំលៀកបំពាក់ ស្បែកជើង និងផលិតផលធ្វើដំណើររបស់កម្ពុជា មានតម្លៃជាង១៣ពាន់លានដុល្លារ ហើយសហរដ្ឋអាមេរិក ជាទីផ្សារធំបំផុត។
អ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ បានលើកឡើងថា សហរដ្ឋអាមេរិកបានទម្លាក់ពន្ធពី៣៦មកនៅត្រឹម១៩% នៅតែជាអាត្រាមួយដែលកម្ពុជាប្រឈមការប្រកួតប្រជែងខ្ពស់នៅក្នុងតំបន់ ដែលទាមទារឱ្យរដ្ឋាភិបាល ត្រូវមានដំដោះស្រាយមួយចំនួន ដូចជាលើកកម្ពស់សិទ្ធិសេរីភាពរបស់កម្មករ កាត់បន្ថយអំពើពុករលួយ និងពិចារណាលើការផលិតតម្លៃវត្ថុធាតុដើមដោយខ្លួនជាដើម។
ខ្ញុំយល់ថា វា (អត្រាពន្ធ១៩) ជាការវិវឌ្ឍវិជ្ជមានមួយ ហើយវាក៏ជាដំណឹងល្អ សម្រាប់កម្មករនយោជិត និងពាក់ព័ទ្ធនៅក្នុងវិស័យការងារ។
— លោក ឃុន ថារ៉ូ
ចំណែកលោកនាយករដ្ឋមន្ត្រី ហ៊ុន ម៉ាណែត បានសរសេរលើទំព័រហ្វេសប៊ុកអរគុណប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) ដែលបានបញ្ចុះពន្ធពី៤៩% មកនៅត្រឹម១៩% ដែលជាដំណឹងល្អសម្រាប់ប្រជាពលរដ្ឋខ្មែរ និងសេដ្ឋកិច្ចរបស់កម្ពុជា ដើម្បីបន្តអភិវឌ្ឍប្រទេសជាតិតទៅមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។